معنى السياسة
عارف انك هتقولي أنا مالي بالسياسة خليني أكل عيش وأربي العيال ,
طيب تعالى نفكر سوا في الكلمتين دول,
يعني إية أكل عيشك يعني مرتبك لو كنت موظف, يعني مكسبك من التجارة, يعني يوميتك في المكان إللي شغال فيه .
ويعني إية تربي العيال يعني توفر ليهم سكن مناسب وتلبسهم و تعلمهم عشان يعرفوا يلاقوا شغل
وكل ده طبعا صعب جدا في بلدك ,
عارف صعب ليه؟ لأنك بعيد عن السياسة وفاكر إنك بتبعد عن المشاكل وانت في الأصل بتبعد عن أكل عيشك ومستقبل اولادك,
لأنك فاهم السياسة غلط, السياسة هي الحكومة اللي بتديك مرتبك وهي قرارات وزير المالية أنه يفرض عليك ضرايب جديدة,
هي قرار الحكومة انها تديك علاوة سنوية وهي قرارات الجكومة برفع اسعار السلع ,
السياسة هي البرلمان اللي انت بتنتخبه عشان يدافع عن مصالحك
لكنه بيوافق على قانون الطوارئ علشان تفضل خايف تتكلم
هي قرارت وزير التعليم للتطوير التعليم لكنه بسببها ما بقاش في تعليم صح لأولادك
و هي وعود الحكومة بتقليل نسبة البطالة ومابيحصلش.
شفت ازاي إن الكلمتين اللي انته قلتهم هم المعنى الحقيقي للسياسة .
السياسة هي المتحكمة في كل حاجة في حياتنا
وإنك لما تبعد عن السياسة يبقى بتضيع لقمة عيشك تستلف عشان تربي اولادك.
لازم تعرف إن فيه فرق بين إنك سياسي أو عضو في الاحزاب وبين انك تكون مواطن عادي عايش حياتك بشكل طبيعي
لكن بتشارك في السياسة وليك رأي وبتدافع عن حقك, برأيك ده بتشارك في صنع القرار السياسي اللي بيتحكم في حياتك.
لأن كل مشاكلنا سببها قرار سياسي غلط و القرار بيتاخد غلط لأن أصحاب القرار مش بيعملوا حسابك لأنهم عارفين إنك بعيد عن السياسة ,
جه الوقت اللي تصحح فيه رأيك عن السياسة وتفهم اصحاب القرار في البلد انك هتدافع عن مصلحتك وأكل عيشك
لازم الجكومة و البرلمان يعرفوا وانته كمان تعرف ان الشعب اللي بيختارهم ممكن يختار غيرهم,
والحل في إيدك لأن وجودهم مرتبط بقرار منك.
موضوع: معنى السياسية 
الإثنين يوليو 08, 2013 7:18 pm
